Бүгін Ақтөбе гуманитарлық колледжінде Ұстаздар күні мерекесі қарсаңында дәстүрге айналған «Ұстаз.Жастар.Болашақ-2020» форумы сегізінші жыл және ерекше форматта өткізілді. Осы сегіз жыл ішінде колледж ұжымы 29 оқытушы мен 10 қызметкерді мамандар даярлаудағы табысты еңбектері мен қызметтерін бағалай отырып, құрметпен зейнеткерлікке шығарып салды. Биыл да колледж директоры Нұрғалиев Ералы Ғұбайұлы білім беру саласында абыройлы еңбек етіп, оқу орнымыздың дамуына елеулі үлес қосқан ұлағатты ұстаздарымыз - музыка пәні оқытушысы Каликов Малик Хусаинович пен қазақ тілі мен әдебиеті пәні оқытушысы Алдоңғарова Ақпатша Дәрібайқызына үлкен алғыс білдіре отырып, колледж директоры және кәсіподақ ұйымы атынан алғыс хатпен, ақшалай сыйлықпен марапаттады.
Сонымен қатар колледж басшысы ұстаздар қауымын кәсіби мерекемен құттықтап, шығармашылығымен және шәкірттерінің жетістіктерімен ерекше көзге түскен оқытушыларымызды кәсіподақ ұйымы атынан алғыс хат және сыйақымен марапаттап, зор денсаулық, қажымас қайрат, шығармашылық табыс тіледі.
